Тажикстанда кармалган үч кыргызстандык мекенине кайтарылды. Бул тууралуу КР УКМКнын Чек ара кызматы билдирди.
Мындай чечим эки өлкөнүн чек ара өкүлдөрүнүн жолугушуусунун жыйынтыгында кабыл алынганы такталды. Ошондой эле Борбордук – Арка (Худжент – Канибадам) автожолунун боюндагы курулушка байланыштуу көйгөйлөр талкууланды.
«Тажик тарап курулушту токтотуу боюнча чараларды көрөрүн билдирди. «Кулунду-автодорожный» өткөрмө бекетинде тажик чек арачылары үч кыргызстандыкты кыргызстандык кесиптештерине өткөрүп беришти, дагы үчөө жакынкы арада мекенине кайтарылат. Кыргыз тарап өз кезегинде Кыргыз Республикасынын аймагында кармалган эки тажик жаранын өткөрүп берет. Тараптар ошондой эле Сүлүктү-Пролетарск темир жол тилкесин демонтаждоо маселесин карап, эки мамлекеттин Лейлек жана Ганчин райондорунун жетекчилеринин деңгээлинде жолугушууну пландаштырышты», — деп билдирди Чек ара кызматы.