Фейсбук социалдык баракчасында эртең менен түз эфирге чыгып «өзүмдү өзүм асып өлөм» деп токойду көздөй бараткан жаран жөнүндө маалымат такталып жатат. Бул тууралуу элчиликтен маалымдашты.
Билдирүүгө ылайык, бул окуя кечээ, эртең менен Москва областынын аймагында болгону аныкталды.
“Социалдык тармакка тараган видео жөнүндө маалымат түшөөрү менен КРнын РФдагы Элчилиги жана Консулдук бөлүм тарабынан жасалган ыкчам аракеттердин жыйынтыгында өзүн өлтүргүсү келген жарандын өздүгү такталды. РФнын полиция бөлүмүнө телефон чалып чакырылды. Токойду көздөй басып баратып видео эфирге чыккан жаран мас абалында болгону маалымдалат. Окуяга байланышкан жагдайлар такталып жатат”, — деп айтылат билдирүүдө.