Кыргыз Республикасынын Президенти, Жогорку Евразиялык экономикалык кеңештин (ЖЕЭК) төрагасы Садыр Жапаровдун төрагалыгы алдында бүгүн, 27-майда, видеоконференция форматында ЖЕЭКтин кезектеги жыйыны болуп өттү.

Иш-чара Беларус Президенти Александр Лукашенко, Казакстандын Президенти Касым-Жомарт Токаев, Россиянын Президенти Владимир Путин, Армениянын Премьер-министри Никол Пашиняндын катышуусунда өттү. Байкоочу өлкө лидерлери катары Өзбекстандын Президенти Шавкат Мирзиёев катышып, ал эми Кубанын Президенти Мигель Диас-Канель видеокайрылуу жасады.

Кеңейтилген жана чакан курамдагы жыйында ЕАЭБдин 2022-2023-жылдарга карата макроэкономикалык саясатынын негизги багыттары, 2021-жылы ЕАЭБдин ички рыногундагы тоскоолдуктарды жоюу боюнча иштердин жыйынтыгы, ЕАЭБдин эл аралык ишмердүүлүгүнүн негизги багыттарынын ишке ашуусу жана башка актуалдуу маселелер каралды.

ЖЕЭКтин кезектеги жыйынынын жыйынтыгы менен Биримдиктин мүчө өлкөлөрүнүн евразиялык интеграциясын тереңдетүүгө жана экономикалык кызматташтыкты өнүктүрүүгө багытталган бир катар чечимдер жана документтер кабыл алынды.