Ташиев Тажикстан Республикасы менен кол коюлган протоколдун чоо-жайын айтып берди

Кыргыз Республикасынын Улуттук коопсуздук боюнча мамлекеттик комитетинин (УКМК) төрагасы Камчыбек Ташиев журналисттерге кыргыз-тажик чек арасындагы кырдаалды жөнгө салуу боюнча Тажикстан менен кол коюлган протоколдун чоо-жайын айтып берди.

Анын айтымында, бул протокол кырдаалды турукташтыруу алкагында түзүлгөн жана эч кандай подтекстти камтыбайт. «Жер сатылган эмес. Жерибиздин бир сантиметрин да бербейбиз. Протоколдо кырдаалды жөнгө салуу маселеси гана камтылган», – деди ал.

Улуттук коопсуздук боюнча мамлекеттик комитеттин башчысы ошондой эле «Тамдык» заставасы менен «Булак-Башы», «Катта-Туз», «Ак-Сай» үч көзөмөл-өткөрүү пункттары жаңжалды жөнгө салууга гана багытталганын белгиледи.

«Анткени бул аймактарда чыр-чатактар ​​көп болот. Буга байланыштуу заставаларды убактылуу консервация кылынып, оор аскердик техникаларды чыгаруу чечими кабыл алынды. Бирок, жер-жерлерде дегеле контролдоо органдары орнотулбайт деген кептер чындыкка коошпойт. Аймактарга камералар орнотулуп, укук коргоо органдарынын өкүлдөрү коштоп жүрүшөт», – деп түшүндүрдү ал.