Бишкекте үстүбүздөгү жылдын 6-январында Борбор Азиядагы эң кубаттуу «Камбар-Ата-1» ГЭСин куруу боюнча үч тараптуу документке кол коюлган. Курулуш документине Кыргызстан, Казакстан жана Өзбекстандын энергетика министрликтери кол коюшту. Мындай маанилүү документке кол коюу Чолпон-Атада өткөн Борбор Азия мамлекеттеринин мамлекет башчыларынын жайкы саммитинде өлкө лидерлери Садыр Жапаров, Касым-Жомарт Токаев жана Шавкат Мирзиёевдин макулдашуусу менен ишке ашты.
КМШнын эмгек сиңирген энергетики, электр тармактар тармагындагы эксперт Бекбоо Маматбеков «Кабар» агенттигине берген маегинде билдиргендей, «Камбар-Ата-1» жана «Камбар-Ата-2» долбоорлору ар дайым приоритеттүү болушу керек жана мамлекет аларды курууга милдеттүү. Ошол эле учурда эксперт долбоорлордун баасы өтө кымбат экенин, курулуш жагынан башка өлкөлөр менен өнөктөш болуу учурдун жана иштин чыныгы жагдайы ушундай экенин баса белгиледи.
«Бүгүн Кыргызстан өзү «Камбар-Ата-1″ ГЭСин кура албайт. Бул дээрлик 2000 МВт электр энергиясын иштеп чыгаруучу абдан кубаттуу гидроэлектростанция. Аны ишке ашыруу менен өлкөдө электр энергиясынын тартыштыгынан келип чыккан бир катар олуттуу көйгөйлөр дароо чечилмек. Элдин саны өскөн сайын жашоонун сапаты, экономиканын деңгээли, электр энергиясына болгон суроо-талап да өсүүдө. Ошол эле учурда Кыргызстан суунун булагында болуу менен өзүнүн потенциалын толук ишке ашыра албайт. Белгилүү болгондой бүгүнкү күндө жалпы энергетикалык потенциалдын 10%ы гана ишке ашты, бул өтө аз», — деди ал.
Эксперт ошондой эле электр энергиясы кризисинин абалы жылдан жылга начарлай берерин кошумчалады.
«»Камбар-Ата-1» деңгээлиндеги жаңы кубаттуулуктарды ишке киргизмейинче, бизде дайыма электр энергиясы тартыш болот. Мисалы, кышында электр энергиясын керектөө дээрлик үч эсеге өсөт. Өз кезегинде бардык суроо-талапты жаба турган өндүрүш жок. Чакан ГЭСтерди өнүктүрүүгө басым жасоо менен маселени чечүү мүмкүн эмес. Буга байланыштуу «Камбар-Ата-1″ ГЭСинин курулушуна ар дайым умтулушубуз керек», — деп жыйынтыктады эксперт.