Баткендеги жабыркаган элге, ишкерлерге компенсация кыска мөөнөттө төлөнөт дешти

Баткендеги чек ара чатагынан жабыр тартып зыянга учураган жергиликтүү элге, ишкерлерге финансылык каражаттарды кыска мөөнөттө төлөөнү жүргүзүүнү баштаңыздар. Мындай көрсөтмөнү министрлер кабинетинин башчысы Акылбек Жапаров бергенин өкмөттүн маалымат кызматы билдирди.
“Айрыкча, ишкерлерге компенсация берүү жагын карап чыгалы. Чындыгында ишкерлер эле эмес, мал-жанынан айрылган эл деле эмне менен оокат кылабыз деп жатышат. Бул — туура маселе. Үй эмеректери күйдү, мал-жаны өлдү, жоголду, уурдалды. Тизмелер такталсын. Зыянды компенсациялоонун тартиби боюнча жобо иштелип чыксын. Жабыр тарткан жарандарга финансылык каражаттарды кыска мөөнөттө төлөөнү жүргүзүүнү баштаңыздар”, — деген Жапаров.
Мындан тышкары, Жапаров тиешелүү мамлекеттик ведомстволорго кыргыз-кытай, кыргыз-өзбек бизнес-форумдарын Баткен облусунда өткөрүү үчүн сунуштарды иштеп чыгууну тапшырып, Баткен экономиканын кайнаган жерине айланышы керек экенин айткан.
“Эки жылда Баткен жергеси эки жолу чек ара маселесинен жабыр тартты. Бирок ага карабастан биз эки жолу калыбына келтирип жатабыз. Тынчтык эле болсунчу. Президент Садыр Жапаров Баткенге жардам берүүдөн тажабайт жана анын гүлдөп өсүп-өнүгүүсүнө болгон күчтү жумшоону баарыбыздан талап кылат. Биз аны кынтыксыз аткарууга милдеттүүбүз”, — деген Акылбек Жапаров.
Баткен жергесинде абал кыйын экенин айткан өкмөт башчы мамлекеттин казынасы толуп турбаса Баткенди калыбына келтирүүгө каражат табуу кыйын болорун, ошол себептүү кассага көзөмөл кылуучу машиналарды иштетүүнү токтотпостон, көзөмөлдүн күчөтүлүүсүн кошумчалаган.
Маалымат кызматынан билдиришинче, 2023-жылдын сентябрына чейин бардык социалдык объектилердин бүткөрүлөрү пландалууда. Турак үйлөргө жана социалдык объектилердин курулушуна жалпысынан 1 млрд. 360 млн. сом мамлекет тарабынан которулган.