Коом
Кыргызстанга БУУнун башкы катчысы Антониу Гутерриш келди
Бириккен Улуттар Уюмунун башкы катчысы Антониу Гутерриш кечээ, 1-июлда, Кыргызстанга келгенин министрлер кабинетинин маалымат кызматы билдирди.
Аны “Ысык-Көл” эл аралык аэропортунан өкмөт башчынын орун басары Эдил Байсалов тосуп алды.
“Башкы катчы сапардын алкагында Кыргызстандын президенти Садыр Жапаров, тышкы иштер министри Жээнбек Кулубаев менен эки тараптуу сүйлөшүүлөрдү жүргүзөрү, ошондой эле БУУнун Өнүктүрүү программасынын долбоорлорунун бирине барары пландалууда”, — деп айтылат маалыматта.
Тараптар БУУнун алкагында кызматташуунун абалын жана келечегин талкуулап, эл аралык күн тартибиндеги актуалдуу маселелер боюнча пикир алмаша турганы белгилүү болду.
Буга чейин Антониу Гутерриш Кыргызстанга 1-3-июль күндөрү иш сапары менен келери айтылган.
