Дүйнөдөгү жана региондогу кырдаалдын курчушу коопсуздук коркунучтары менен күрөшүүдө гана эмес, тынчтыкты жана туруктуулукту сактоодо да күч-аракеттерди бириктирүүнү талап кылат. Буга байланыштуу Жамааттык коопсуздук кеңешинин “ЖККУ алкагында союздаштык мамилелерди мындан ары чыңдоо жөнүндө” чечими кызматташтыкты союздаштыктын духунда мындан ары курууга болгон жалпы умтулууну айгинелейт», — деп бүгүн, 28-ноябрда, президент Садыр Жапаров Казакстандын Астана шаарында өтүп жаткан Жамааттык коопсуздук жөнүндө келишим уюмунун (ЖККУ) Жамааттык коопсуздук кеңешинин чакан форматтагы сессиясында билдирди.
Сессиянын жүрүшүндө эл аралык жана регионалдык коопсуздуктун актуалдуу көйгөйлөрү, ошондой эле ЖККУнун сессиялар аралык мезгилдеги ишмердүүлүгүнүн негизги жыйынтыктары талкууланды.
Президент Садыр Жапаров глобалдык геосаясий өзгөрүүлөрдүн фонунда тынчтыкты, эл аралык жана регионалдык коопсуздукту сактоо боюнча ЖККУга мүчө мамлекеттердин өз ара тыгыз аракеттенүүсү зарыл экенин айтты. Ал биргелешкен аракеттер менен Уюмдун потенциалын бекемдөө ишинде олуттуу натыйжаларга жетишүүгө болорун баса белгиледи.
Жыйындын жүрүшүндө Беларустун президенти Александр Лукашенко, Казакстандын президенти Касым-Жомарт Токаев, Россиянын президенти Владимир Путин, Тажикстандын президенти Эмомали Рахмон жана ЖККУнун башкы катчысы Имангали Тасмагамбетов да сөз сүйлөштү.
ЖККУга төрагалык кылуу 2025-жылы Казакстандан Кыргызстанга өтөт.
