Кечээ, 10-декабрда KFU Football Awards — өткөн сезондун жыйынтыгы боюнча Кыргызстандын футбол тармагындагы эң мыктыларын сыйлоо аземи орун алды. Кыргыз футбол биримдиги футболдогу жетишкендиктер үчүн жыл сайын өтүүчү, индивидуалдуу сыйлыктарды тапшырды. Салтанаттуу сыйлык тапшыруу кечесине футбол үй-бүлөсүнүн мүчөлөрү чакырылган.
Аземдин алкагында төмөндөгү номинациялар боюнча жылдын мыктылары аныкталды:
«Кыргыз Республикасынын мыкты футболчусу 2024» — Жоэл Кожо;
«Кыргыз Республикасынын футзал боюнча мыкты оюнчусу 2024» — Кайрат Кубанычов;
«Кыргыз Республикасынын кыз-келиндер футболунун мыкты оюнчусу 2024» — Айжан Боронбекова;
«Футбол боюнча Кыргыз Республикасынын мыкты жаш оюнчусу 2024» — Эрмек Кенжебаев;
«Кыргыз Республикасынын футбол боюнча мыкты машыктыруучусу 2024» — Ислом Ахмедов;
«Кыргыз Республикасынын футзал боюнча мыкты машыктыруучусу 2024» — Мирланбек Абдыкадыров;
«Кыргыз Республикасынын кыз-келиндер футболунун мыкты машыктыруучусу 2024» — Гүлбара Уматалиева;
«Кыргыз Республикасынын футбол боюнча мыкты калысы 2024» — Вероника Бернацкая;
«Кыргыз Республикасынын футзал боюнча мыкты калысы 2024» — Талантбек Раимбердиев;
Мыкты футбол клубу 2024 – «Абдыш-Ата» футболдук клубу;
Мыкты регионалдык уюм – Жалал-Абад облусунун футбол ассоциациясы;
Мыкты спорттук уюм – «Барселона» футбол академиясы.
«Жылдын мыкты футболчусу» жана «Жылдын мыкты машыктыруучусу» наамдар боюнча президенттин «2024–2034-жылдары Кыргыз Республикасында футболду өнүктүрүү боюнча чаралар жөнүндө» жарлыгына ылайык 500 миң сом өлчөмүндөгү атайын сыйлыктар тапшырылды.
“Быйылкы жыл мен үчүн абдан чоң мааниге ээ жыл болду деп айта алам. Сыйлыкка ээ болгонум үчүн абдан кубанычтамын. Анткени бул жылы мен өзүмдү толугу менен футболго арнадым. Бул жыл эле эмес, мен ар дайым болгон күчүмдү жумшайм. Бирок ушул жыл мен үчүн өзгөчө болду. Абдан кубанычтамын. Бул жерде болуу мен үчүн оңой болгон жок. Ушул сыйлыкты алып ушул жерде турганыма кубанычтамын”,- деди «Жылдын мыкты футболчусу» аталган Жоэл Кожо.
