Калифорниядагы учак кырсыгында 2 адам каза болду
АКШнын Калифорния штатындагы Фуллертон шаарында учак кырсыгы катталды. Кичинекей учак жергиликтүү ооруканага таандык медициналык буюмдардын кампасынын чатырына кулап түшкөн.
Кырсык 2-январда жергиликтүү убакыт боюнча саат 14:09да (04:09 3-январда Бишкек убактысы боюнча) Фуллертон аэропортунун жанында болгон. Учак жерге кулагандан кийин өрт чыккан. Кампанын кызматкерлери жана коңшу имараттардагылар тез арада эвакуацияланды.
Акыркы маалыматтар боюнча, кырсыктан учактын учкучу жана жүргүнчүсү каза болгон. 18 адам жабыркады. Алардын баары имараттын ичинде кулаган учурда болгон кампа кызматкерлери.
Кырсык учак конууга аракет кылган учурда болгон. Окуянын себептери азырынча белгисиз, тергөө иштери уланууда. Интернетте кампанын чатырындагы өрт менен түтүндү тартып алган окуя болгон жердин кадрлары тарады.
