3 айлык наристени батирге алмашууга аракет жасаган атасы менен кызы кармалды
Өзбекстандын Навои облусунда үч айлык баланы үч бөлмөлүү батирге алмаштырууга аракет жасаган аял менен ымыркайдын чоң атасы кармалды. Бул тууралуу 27-майда Навои облусунун Ички иштер башкармалыгынын басма сөз кызматынын маалыматына шилтеме берип Баракелде сайты жазып чыкты.
Расмий маалыматка ылайык, аял менен анын атасы 23-майда укук коргоо органдарынын кызматкерлери тарабынан жүргүзүлгөн операция учурунда кармалган.
«Навои шаарында ижарага алынган батирде жашап жаткан 1987-жылы туулган З.О. аттуу аял киши 2020-жылы туулган баласын сатуу учурунда кармалган. Болжол менен 250 миллион сумдук (25 миң доллар) үч бөлмөлүү батирге алмашууга аракет жасаган. Маалым болгондой, аталган аял 1951-жылы туулган А.О. аттуу атасы менен биргиндик болгон», — деп айтылат билдирүүдө.
Буга чейин 25-майда Өзбекстандын Ички иштер министрлиги Каракалпакстандын Төрткүл районунда 13 жаштагы баласын 15 миң долларга сатууну көздөгөн аял кармалганын маалымдаган. Мындан сырткары бир нече күн мурун дагы бир аял 2 жаштагы баласын 7 700 долларга сатууга аракет жасаганы маалым болгон.
