Кыргызстанга 5G технологиясы киргизиле элек. Бул тууралуу Маалыматтык технологиялар жана байланыш боюнча мамлекеттик комитеттин маалымат кызматы билдирди.
Маалыматка ылайык, Кыргызстандагы байланыш операторлору Мамлекеттик байланыш агенттигинин уруксатысыз 5G тармактарынын жабдууларын орнотуп да, иштете да алышпайт.
Коомчулукта 5G технологиясынын зыяндуулугу жана ал аркылуу жугуштуу жана башка оорулардын жайылып жатканы жөнүндө маалыматтар тарап жатат.
Ошол эле учурда 5G технологиясын колдонуу боюнча лабораториялык текшерүүлөр жүргүзүлүп, ден-соолукка эч кандай коркунучу жок экендиги тастыкталгандыгын белгилей кетүү керек.
Жогоруда айтылгандарды эске алганда, жаңы технологиянын зыяндуулугу жөнүндө социалдык тармактар аркылуу таратылган билдирүүлөр чындыкка дал келбейт.