Нааразылык акциясы өтүп жаткан Беларустун борбор калаасында адам өлүмү катталды. Бул тууралуу чет элдик жалпыга маалымдоо каражаттары жазышты.
Маалыматка ылайык, 10-август күнү саат 23:00 чамасында Минск шаарында топтолгон эл кыймылын бууш үчүн тосмолорду коё баштаган. Аянтты тазалоо үчүн келген атайын бөлүктүн жоокерлери менен кагылышуу учурунда бир киши аларды көздөй жардыруучу затты ыргытууга аракет кылган. Бирок ал колдо жарылып, бир эркек киши алган жаракатынан улам көз жумгандыгы белгилүү болду.
Белгилүү болгондой, нааразылык акциялары 9-августта өткөн президенттик шайлоодон кийин башталган. Ушу тапта элдин толкундоолору өлкөнүн дээрлик бардык аймагына жайылды. Милиция нааразы болгондорду таратуу үчүн көздөн жаш агызуучу газ менен кулак тундуруучу гранаталарды колдонууда.
Шайлоонун жыйынтыгында президент Александр Лукашенко бир топ айырма менен атаандаштарынан озуп, дагы беш жылга өлкө башчысы катары шайлангандыгы элдин нааразычылыгын жаратып, митингге чыгуусуна себеп болгон.
Ошол эле учурда дүйнөнүн бир топ өлкө башчылары
Лукашенкого кайра президент болушу менен куттукто телеграммаларын жолдоодо.