Шайлоо – 2020. БШК 1912 талапкерди депутаттыкка каттады

Борбордук шайлоо жана референдум өткөрүү боюнча комиссиясы 15 саясий партиядан 1912 талапкерди каттады. Бул тууралуу аталган мекеменин басма сөз кызматы билдирди.

Маалыматта айтылгандай, катталган саясий бирикмелер жалпысынан 1 957 талапкерди көрсөттү, алардын 45и өз арыздары боюнча тизмеден чыгарылды.

Парламенттик шайлоого 618 аял ат салышууда.

Эскерте кетсек, БШК 15 саясий партияга шайлоого катышууга уруксат берген.

Шайлоо өнөктүгү кечээ, 4-сентябрда башталды.

Президент Сооронбай Жээнбеков парламенттик шайлоону дайындоо жөнүндө жарлыкка кол койгон. Алар 4-октябрда өтөт.