Баткендин Лейлек району курчоого алынып турат деген маалымат жалган. Бул тууралуу Бишкектеги маалымат жыйында УКМКнын Чек ара кызматынын маалыматтык-аналитикалык бөлүмүнүн жетекчиси Мирзамир Сыдыков билдирди.
Анын айтымында, Лейлекте Чек ара кызматынын тийиштүү күч жана каражаттары бар.
“Алар өз кызматтарын аткарып жатат. Бирок Лейлекти Баткен шаары менен байланыштырган жолдордо маал-маалы менен тоскоолдуктар болуп, жолду жабууга аракеттер болууда”, — дейт ал.
Эскерте кетсек, 28-апрелде Баткен районунун Көк-Таш айылындагы суу бөлүштүрүүчү жайга Тажикстандын жарандары видеокөзөмөл орното баштаган. Ага кыргызстандыктар каршы чыгышкан, көп өтпөй эки элдин жарандары бири-бирине таш ыргытуудан абал курчуп кеткен.
Акыркы маалыматтарга караганда, кыргыз-тажик чек арасындагы чырдан жалпы 163 адам жабыркап, 33 киши каза болду.