ККМ колдонуу: салыктан бошотуу босогосун 16 млн. сомго көтөрүү каралууда
Контролдук-кассалык машина (ККМ) колдонуп иштеген ишкерлерди салыктан бошотуу босогосун 16 миллион сомго чейин көтөрүү каралууда. Бул туурасында экономика жана коммерция министри Данияр Амангелдиев «Биринчи радиого» берген маегинде билдирди.
«Жумушчу топ жылдык жүгүртүүсү 8 миллион сомдук босогону 12 же 16 миллион сомго чейин көтөрүүнү, андан тышкары, коомдук тамактануучу жайлардын бирдиктүү салыгынын ставкасын төмөндөтүүнү сунуштадык. Муну министрлер кабинетинин төрагасы Акылбек Жапаров дагы колдоду. Анда күнүнө 43 миңге чейин соода кылса эч кандай салык төкпөй калат. Андан ашса эки пайыз менен төлөйт. Эгер тогуз ай бою 16 миллион сомдук соода кылса, ары жактагы үч ай үчүн эле салык төлөп жатпайбы. Ушуну элге түшүндүрүп жатабыз», — деди Амангелдиев.
Ошондой эле ал базарларда ушак тарап кетип жатканын белгиледи. Министр өзү жакында эле Токмокко барып беш чоң соода түйүндүн ээлери гана соодагерлерди ККМге каршы үндөп жатканына күбө болгонун айтты. Элге түшүндүргөндөн кийин «такыр эле салык төлөбөйт турбайбызбы» деп туура кабыл алып калганын кошумчалады.
