Баткен облусунун Лейлек районунун Көк-Таш айылында кыз-келиндер арасында футбол боюнча мелдеш өттү. Бул тууралуу иш-чаранын уюштуруучусу, активист жана укук коргоочу Гази Бабаярова билдирди.
Анын айтымында, беттешке 10 команда катышты. Бул Гази Бабаярова уюштурган экинчи турнир. Биринчи жолу үч жыл мурун ушул эле айылда оюн өткөргөн.
«Акыркы жылдары коронавирус пандемиясынан улам турнирди өткөрүүгө мүмкүн болбой калган. Чек арага жакын аймактагы аялдардын жашоодон кубанычы аз. Дээрлик ар бир үй-бүлөдө эркектердин бири чет өлкөлөргө иштегени кеткен. Аялдардын назик ийиндерине көп нерсе түшөт. Чек арадагы тынымсыз чыр-чатактар да стрессти күчөтөт. Мен жергиликтүү кыздарга кандайдыр бир жардам берүүнү чечтим. Эми алардын футбол ойноп көзүндөгү кубанычты көрүп сүйүнөм», — дейт Гази Бабаярова.
Гази Бабаярова чек арада балдарынын коопсуздугунан дайыма коркуп жашаган аялдар жакшы моралдык колдоого муктаж экенине ишенет.
Кыз-келиндер арасындагы футбол боюнча мелдеште “Ынтымак” (3-орун), “Бий Тоо” (2-орун), “Алга!” (1-орун) командалары жеңишке жетишти.
