Кыргызстандык суучул Денис Петрашов 200 метрди брасс ыкмасы менен сүздү.
Жалпысынан мелдешке 25 спортчу катышып, алар 4 топко бөлүнүп жарышты. Петрашов үчүнчү жарышка чыгып, 2 мүнөт 10,99 секундада келди. Муну менен ал өз тобунда 6-орунду ээледи.
Жалпы 25 катышуучунун жыйынтыгы боюнча, Денис Петрашов 16-орунду ээлеп, жарым финалга чыгууга мүмкүнчүлүк алды.
Жарым финалдык жарыштар 30-июлдан 31-июлга караган түнү Бишкек убактысы боюнча саат 01:59да башталат.
Буга чейин Денис Петрашов 27-июлда 100 метрлик жарышта 23-орунга жайгашып, жарым финалга чыга алган эмес.
Белгилей кетсек, Париждеги жайкы Олимпиада оюндары 26-июлдан 11-августка чейин, Паралимпиадалык оюндар 28-августтан 8-сентябрга чейин өтөт. Кыргызстандын 16 спортчусу сууда сүзүү, спорттук күрөш, жеңил атлетика, дзюдо жана бокс боюнча мелдештерге катышат.
