Нигерияда күйүүчү май ташыган унаанын жарылуусунан каза болгондордун саны 147 адамга жетип, дагы жүзгө жакын жабырлануучу ооруканага жеткирилгенин Рейтер агенттиги жергиликтүү полиция жана өзгөчө кырдаалдар кызматынын өкүлүнө таянуу менен билдирди.
Буга чейин 94 адамдын өлүмү катталган. Кээ бир денелер таанылгыс болуп күйүп кеткен. Каза болгондордун алгачкылары 16-октябрда жерге берилди.
Жарылуу 15-октябрга караган түнү Жигава штатында болгон. Айыл ичиндеги жолдо күйүүчү май ташыган унаа оодарылып, күйүүчү май аккан. Бул күйүүчү майды жергиликтүү тургундар чогулта башташкан. Полициянын айтымында, алар адамдарды унаага жакындатпоого аракет кылышкан, бирок элди башкара алышкан эмес. Күйүүчү май ташыган унаанын айдоочусу эч кандай жаракат алган эмес жана кармалган.
