Камчыбек Ташиев Талас облусунда УКМК кызматкерлери үчүн салынган спорт залы менен таанышты
Бүгүн, 12-ноябрь күнү Талас облусунун Талас шаарында КР УКМК төрагасы генерал-полковник К.Ташиев УКМК кызматкерлери үчүн салынган спорт залын көрүп чыкты.
Төрага спорт залында түзүлгөн шарттар менен таанышып, ар бир кызматкер спорт менен жакын болуусу керектигин белгиледи.
Ошондой эле, коопсуздук кызматкерлеринин дени сак жашоосу, алардын кызматтык милдеттерин жогорку деңгээлде аткаруусуна себепчи болоорун кошумчалады.
Аталган имаратта волейбол, баскетбол аянтчасы жана кошумча машыгуу залы каралып, тийиштүү жабдуулар орнотулган.
Белгилей кетсек, спорт залын курууга Президенттик фонддон 50 млн сом акча каражаты бөлүнгөн. Курулуш иштери 2023-жылы КР Президенти С.Жапаровдун тапшырмасы менен башталып, 2024-жылы бүткөрүлүп, май айында пайдаланууга берилген.
