Ысык-Көлдө пирстердин үстүнө бууканаларды салууга камынган Нурдан Орунтаев эмнеге 180 градуска өзгөрүп жатат?
Жогорку Кеңештин 15-январындагы жыйынында депутат Гуля Кожокулова Мамлекеттик курулуш агенттигинин жетекчиси Нурдан Орунтаев эмнеге оюн өзгөртүп жатканына кызыкты.
Буга чейин Архитектура, курулуш жана турак жай-коммуналдык чарба мамлекеттик агенттиги Ысык-Көлдө пирстердин үстүнө бууканаларды (парилка) салууга уруксат берүүнү сунуштаган. Тиешелүү токтом долбоору коомдук талкууга коюлган.
«Нурдан Орунтаев менен эмне болуп жатканын түшүнө албай жатам. Бир карасаң мыйзамды, президенттин буйругун так аткарып жатканын көрүүгө болот. Азыр болсо, Ысык-Көлдө пирстердин үстүнө бууканаларды (парилка) салууга уруксат берүүнү сунуштаган долбоорду коомдук талкууга койду. Эмне болуп жатат? Эмнеге 180 градуска өзгөрүп жатат. Ал эмне Ысык-Көлдүн экологиясын коргоо боюнча президенттин буйругу бар экенин билбейби? Биз Орунтаевди жыйынга чакырып, аны угушубуз керек окшойт», — деди эл өкүлү.
