Маданият, маалымат, спорт жана жаштар саясаты министрлиги 2021-жылдын 23-25-апрелине чейин Баткен шаарында “Салттуу музыка жумалыгы” жана эл аралык “Достук” фестивалын өткөрөт.
Фестивалга Кыргызстан, Өзбекстан жана Тажикстандан келген көрүнүктүү маданият өкүлдөрү, салттуу музыканы алып жүргөн дасыккан чеберлер жана өсүп келе жаткан жаш таланттар катышат.
Иш-чара калкка руханий гүлазык катары баалуулуктардын башатында турган оозеки салттагы профессионалдык музыкалык искусствону сактоо, өркүндөтүү жана жайылтуу максатын көздөп, коңшу жашаган элдердин ынтымакты бекемдөө менен, алардын салттуу музыкалык искусствосун таануу болуп саналат.
Ошондой эле, иш- чара салттуу маданияттагы кол өнөрчүлүктү даңазалоо аркылуу уста, чеберлерге дем берүүнү көздөп, элдердин достугун, ынтымагын биримдигин бекемдеп, жаш муундардын интернационалдык тарбиясын жакшыртууга багыт алат.
2021-жылдын 23-апрелинде саат 10:00дө А. Жайнаков атындагы Баткен облустук драма театрында иш- чаранын расмий ачылышы башталат. Аны менен катар, Бишкек шаарында “Коомдук руханий адеп-ахлактык өнүгүүсү жана салттуу музыкалык маданият” темасындагы эл аралык илимий-практикалык конференция онлайн форматта өз ишин баштайт.
23-апрель күнү саат 11:00- 17:00 чейин “Айтуучулук күнү” (манасчылык, дастанчылык, акындык өнөрлөр багыты);
24-апрель күнү 10:00-13:00 чейин – “Аспапчылык” багыт (комуз, чоор, кыл кыяк, жетиген, үйлөмө жана какма (темир ооз комуз, жыгач ооз комуз);
14:00-17:30 чейин — “Аваздык- аспапчылык” багыт (ашыктык , раман ырлары, элдик жана автордук чыгармалар, ХХ жана ХХI кылымдагы обончулардын чыгармаларын аткаруу);
17:30- 19:00 чейин – Аспапчылык жана аваздык- аспапчылык багытты өнүктүрүү боюнча тегерек стол.
25-апрель күнү (Баткен шаарынын борбордук аянты):
09:30- 10:00 чейин- Улуттук кийимдердин парады;
09:30 – 18:00 чейин — Кол өнөрчүлөрдүн көргөзмө- жарманкеси;
10:30 “Салттуу музыка күнү” жана эл аралык “Достук”
фестивалынын Гала-концерти өтөт.
Иш-чаралар Маданият, маалымат, спорт жана жаштар саясаты министрлигинин жетекчилиги менен өтүп, Кыргыз Республикасынын Өкмөтүнүн Баткен облусундагы ыйгарым укуктуу өкүлчүлүгү, “Кыргыздын салттуу музыкасы” фонду жана Кыргызстан элинин Ассамблеясы биргеликте иш алып барып жатат.
Мындан сырткары, 23-25-апрель күндөрү Маданият министрлигине караштуу балдар музыкалык, искусство мектептеринде, жогорку жана орто кесиптик окуу жайларда “Салттуу музыка жумалыгына” карата ар кандай багыттагы иш-чаралар өткөрүлөт.
