Кыргызстанда Эл артисти, белгилүү обончу, ырчы Аксуубай Атабаевдин 80 жылдыгы белгиленет. Бул тууралуу Маданият, маалымат, спорт жана жаштар саясаты министрлиги кабарлады.
Маалыматка ылайык, иш-чара 13-декабрь күнү саат 18.00дө Токтогул Сатылганов атындагы Кыргыз улуттук филармониясында өтөт.
Аксуубай Атабаев 1943-жылы 22-декабрда Ысык-Көл облусуна караштуу Ак-Суу районунун Ак-Булуң айылында туулган. Ал Муратаалы Күрөңкеев атындагы музыкалык-хореографиялык окуу жайынын элдик аспаптар бөлүмүн, Бүбүсара Бейшеналиева атындагы Көркөм өнөр институтунун маданий-агартуу факультетин бүтүргөн. Эмгек жолун Абдылас Малдыбаев атындагы Опера жана балет театрында хордун артисти болуп баштап, Токтоболот Абдумомунов атындагы Кыргыз улуттук драма театрында музыкант, филармонияда солист, кийин Республикалык кесиптик-техникалык окуу жайынын маданият ордосунун директору болуп эмгектенген.
Белгилүү обончу 2011-жылы 68 жаш курагында жүрөк оорусунан көз жумган. Анын «Тоолор», «Махабатым», «18 жаш», «Чагылган», «Курбулар» баштаган ырлары классикага айланып, азыркыга чейин эл оозунан түшпөй келет.
