УКМК: Ош облусунда “Йакын-Инкар” диний-экстремисттик агымынын активдүү мүчөлөрү жашаган 7 даректе тинтүү иштери жүргүзүлдү
2024-жылдын 7-майында КР УКМК Ош облусунун ИИБнын Экстремизмге жана мыйзамсыз миграцияга каршы күрөшүү кызматынын кызматкерлери менен биргеликте, диний-экстремисттик уюмдарга каршы күрөшүү боюнча ыкчам-издөө иш-чараларынын жүрүшүндө “Йакын-Инкар” диний-экстремисттик агымынын активдүү мүчөлөрү жашаган 7 турак жайда тинтүү иштерин жүргүздү. Бул тууралуу УКМКнын Басма сөз борборунан билдиришти.
Ыкчам-издөө иш-чараларынын жүрүшүндө 126 материал табылып, анын ичинен 95 китеп, 12 дептер, 18 журнал , 1 күндөлүк, 1 уюлдук телефон алынды.
Алынган материалдардын айрымдары КР аймагында тыюу салынган “Йакын-Инкар” диний-экстремисттик агымына таандык. Мындан улам, аталган предметтер КР Юстиция министрлигине караштуу Мамлекеттик соттук-эксперттик кызматына тиешелүү экспертизага жөнөтүлүп, анын жыйынтыгы боюнча «Йакын Инкар» диний — экстремисттик кыймылынын активдүү мүчөлөрүнө карата КР Кылмыш-жаза мыйзамдарына ылайык укуктук чаралар көрүлөт.
Белгилей кетсек, жүргүзүлгөн профилактикалык иш-чаралардын жүрүшүндө аталган кыймылдын мүчөлөрүнүн бири А.Ш.Д., «Йакын Инкар» диний-экстремисттик кыймылынын радикалдык-экстремисттик идеологиясынын зыяндуулугун толук түшүнүп, мындан ары аталган уюмга мүчөлүктөн өз ыктыяры менен баш тартып, салттуу исламды карманууну убадалады.
