Ошто коменданттык саат 2 саатка кыскартылды

Ош шаарында, Ноокат жана Кара-Суу райондорунда коменданттык саат эки саатка кыскартылды. Бул тууралуу коменданттын маалымат борборунан билдиришкен.

Комендантуранын маалыматы боюнча, тиешелүү буйрукка комендант Малик Нурдинов кол койгон. 16-апрелден 30-апрелге чейин коменданттык саат кечки саат 21:00дөн 06:00гө чейин киргизилет деп болжолдонууда.

Эске салсак, аталган аймактарда 25-марттан 15-апрелге чейин өзгөчө кырдаал киргизилген.

Кечээ, 14-апрель күнү президент Сооронбай Жээнбеков өлкөнүн айрым шаарлары менен райондорунда өзгөчө абал режимин 30-апрелге чейин узартуу жөнүндө жарлыкка кол койгон.

Жарлыкка ылайык, Бишкек шаарынын, Ош шаарынын, Ош облусунун Ноокат жана Кара-Суу райондорунун, Жалал-Абад шаарынын жана Жалал-Абад облусунун Сузак районунун аймактарында өзгөчө абал 30-апрелге чейин узартылууда.

Аталган Жарлык кол коюлгандан тарта күчүнө кирет жана Жогорку Кеңешине бекитүү үчүн жиберилет.

Булак: Кыргызтудей сайты