Президент Сооронбай Жээнбеков 5-май — Баш мыйзамдын кабыл алынган күнү менен жалпы кыргызстандыктарды куттуктады.
Мамлекет башчысынын куттуктоосунун тексти:
«Урматтуу мекендештерим!
Сиздерди 5-Май Конституция күнү менен куттуктайм.
Чейрек кылымдан ашык мезгилден бери Конституциябыз эгемен мамлекетибиздин өнүгүү жолун аныктап, өлкөбүздүн соңку тарыхында өзгөчө ролду ээлеп келет.
Конституция — Кыргызстандын дүйнө коомчулугунда демократиялык мамлекет катары ордун бекемдөөгө, саясий жана экономикалык реформаларды жүргүзүүгө укуктук негиз болду.
Башкы мыйзамыбыздын укуктук гана эмес, руханий жана маданий да мааниси бийик. Элибиздин дүйнө таанымын, келечек мүдөөсүн чагылдырган, өлкөбүздүн келечек багытын аныктоо үчүн пайдубал түзгөн документ катары кызмат кылууда.
Конституцияда камтылган баалуулуктарды, анын нормаларын бекем сактап, өлкөбүздү мындан ары өнүктүрүү — биздин негизги милдетибиз.
Майрамыңыздар менен куттуктап, ар бириңиздерге ден соолук, бакты-таалай, ийгиликтерди каалайм»
Кыргызстан эгемендүүлүккө ээ болгондон кийин 1993-жылы 5-майда Конституциясын кабыл алган.