Австриянын президенти Александр Ван дер Беллен жубайы менен 23.00дөн кийин италия тамактарын жасаган кафеге барып, коронавирустун пандемиясынан улам бардык ресторандар жабылышы керек деген эрежени бузуп, полицияга кармалды, деп жазат Kronen Zeitung гезити.
«Карантин башталгандан бери биринчи жолу эки досум жана жубайым менен тамактанып бардым. Көпкө сүйлөшүп, убакытты унутуп калдык. Мен өтө өкүнүп жатам. Бул ката болчу. Эгер ээси кандайдыр бир жоготууга учураса, мен ага жооптуу болом ”, – деп жазган ал Твиттерде.
Полиция Sole ресторанына саат 00:20 чамасында келип, дасторкон үстүндө суусундуктары бар конокторду көргөн. Белгиленген эрежелерге ылайык, мекеме саат 23.00дө жабылышы керек болчу.
“Федералдык президент, көптөгөн жылдыздар сыяктуу, менин ресторанымдын туруктуу коногу. Ал кечки тамакка балык буйрутма берген. Мен мыйзамда талап кылынгандай, бардыгын туура жасадым, саат 23: 00дө ичкиликтин акыркы айлампасын өткөрүп, ресторан жабылган”, – деп билдирген ресторандын директору Аки Нуредини.
Австрияда ресторандар саат 23: 00дөн кийин жабылышы керек. Ошол эле учурда, конокторго дасторкон үстүндө отура беришине уруксат берген. Эми Вена Магистратурасы ресторандын ээсине 30 миң евро айып пул салуу же бербөө жөнүндө чечим чыгарышы керек.
Гезит белгилегендей, президент менен анын аялына эч кандай коркунуч келбейт.
Австриядагы кафелер, ресторандар жана тамактануучу жайлар 15-майда белгилүү шарттарда ишин улантты. Алар эртең мененки 06.00дөн 23.00гө чейин иштей алышат. Балдарды кошпогондо, бир дасторкондо төрт адам отура алат, ал эми кардарлар тобунун ортосундагы минималдуу аралык кеминде бир метр болушу керек. Кардарлар менен түздөн-түз байланышкан кафенин кызматкерлери мурундан жана ооздон коргонуу же бетине калканыч кийүү талап кылынат, бирок келгендерге беткап кийүүнүн кереги жок.
Акыркы маалыматтарга караганда, Австрияда 16 503 адамда коронавирус аныкталып, 640 бейтап көз жумган.
Булак: Барс медиа