Кыргызстандын аймактарынын инвестициялык мүмкүнчүлүктөрү Екатеринбургда көрсөтүлдү
Бүгүн, 9-июнда кыргыз-орус аймактар аралык тогузунчу конференциясынын алкагында эки өлкөнүн өкүлдөрү Евразия экономикалык биримдигинин мейкиндигинде аймактар аралык кызматташтыкты бекемдөө маселесин талкуулашты. Бул тууралуу экономика жана коммерция министрилигинин маалымат кызматы кабарлады.
Билдирүүгө ылайык, жыйындын катышуучулары Евразия экономикалык биримдигине мүчө мамлекеттердин аймактар аралык жана чек ара кызматташтыгын өнүктүрүү программасынын даярдыгын, анын ичинде аймактар аралык кызматташуунун укуктук негиздерин жана биргелешкен аймактар аралык долбоорлорду колдоонун каржылык инструменттерин изилдеп чыгышып, өз сунуштарын айтышты.
Ошондой эле Кыргызстан менен Россиянын өкүлдөрү аймактар аралык соода-экономикалык кызматташуунун ийгиликтүү тажрыйбасын сунуштап, аймактар ортосунда бизнести өнүктүрүү мүмкүнчүлүктөрүн талкуулашууда.
Россиялык бизнес чөйрөсүнүн өкүлдөрүнө Ош, Талас, Жалал-Абад, Нарын облустарынын инвестициялык мүмкүнчүлүктөрү көрсөтүлдү. Ал эми Кыргызстандын ишкерлерине Орусиянын аймактарынын экономикасын өнүктүрүүнүн артыкчылыктуу багыттары сунуш кылынды.
Ошондой эле Россиянын саламаттыкты сактоо тармагынын медициналык кызматтарды экспорттоо боюнча тажрыйбасы кыргызстандыктарга көрсөтүлдү.
