Нарында бир партиянын үгүтчүсүнүн сабалышы боюнча тергөө иштери жүрүп жатат
Нарында бир партиянын үгүтчүсүнүн сабалышы боюнча тергөө иштери жүрүп жатат. Бул тууралуу Нарын ОИИБдин басма сөз кызматы билдирди.
Маалым болгондой, Нарын райондук ички иштер бөлүмүнө бүгүн, 22-сентябрда саат 12:00 чамасында 1995-жылы туулган А.А. аттуу жигит кайрылып, ушул күнү таңкы саат 06:00 чамасында Нарын районунун Алыш айылында М. аттуу таанышы жана анын достору тарабынан токмок жегенин билдирген.
Алдын ала иликтөөнүн жүрүшүндө А.А. менен М. тойдо конокто болушкан. Болжол менен таңкы саат 05:00 чамасында экөөнүн ортосунда чыр чыгып, уруша кетишкен. Жарым саат өткөндөн кийин М. өзүнүн достору менен келген. Ошол учурда мушташ чыгып, А.А. ооруканага жеткирилген.
Азыркы учурда окуянын чоо-жайы такталып жатат. А.А. бир партиянын, ал эми М. башка партиянын үгүтчүсү. Экөө мурда бир партияда иштеп келишкен.
Аталган факт Жазык кодексинин 266-беренеси (Ээнбаштык) менен Кылмыштардын жана жоруктардын бирдиктүү реестрине катталып, сотко чейинки өндүрүш жүргүзүлүп жатат.
