Кыргызстанда Россиядан келген медициналык волонтерлордун катышуусунда «Миссия Добро» программасы ийгиликтүү аяктады.
Аталган программанын алкагында республиканын ооруканаларында жана поликлиникаларында бир жуманын ичинде «РЖД-Медицина» клиникаларынын тармагынын ар кандай адистиктеги орусиялык алты жогорку квалификациялуу врачтары бейтаптарды 78 текшерүү жана консультация, кесиптештери үчүн 24 лекция, 16 операция, 18 УЗИ текшерүү жана 14 консультация өткөрүштү.
Миссиянын катышуучулары менен жыйынтыктоочу жолугушууда Кыргызстандын саламаттыкты сактоо министри Эркин Чейчебаев россиялык дарыгерлердин ишинин натыйжаларына жогору баа берди: «Программа жемиштүү болгонуна абдан кубанычтамын. Конкреттүү жыйынтыктар бар: операциялар жасалды, жаңы ыкмалар интеграцияланды, россиялык жана кыргызстандык адистер байланыш түзүп, келечекте кызматташууну пландаштырууда. Бул эң негизги жыйынтык жана бизде чоң келечек бар деп ишенем».
Бир жума бою Россиядан келген дарыгерлер Кыргызстандын Саламаттыкты сактоо министрлигинин Улуттук госпиталында, Адамдын репродукциясы боюнча Кыргыз илимий борборунда, М.Миррахимов атындагы Улуттук кардиология жана терапия борборунда, Жүрөк хирургиясы жана органдарды трансплантациялоо илимий-изилдөө институтунда, Кыргыз курортология жана реабилитация илим-изилдөө институтунда, Бишкек темир жол ооруканасы, Республикалык ден соолукту чыңдоо жана массалык байланыш борборунда болушту.
Миссиянын катышуучусу, Красноярск шаарындагы «РЖД-Медицина» тармактык клиникасынын урология бөлүмүнүн башчысы Александр Бережной тажрыйба алмашуунун келечегин жана кыргызстандык кесиптештердин чоң потенциалын белгиледи: «Мага достук маанай абдан жакты. Бир жума бою Улуттук госпиталдын урология борборунда кесиптештерим менен иштештим. Консультацияларды өткөрдүк, операцияларды жасадык, тажрыйба бөлүштүк. Ишти жакшыртуу боюнча сунуштарымды айттым. Борбордун потенциалы чоң, команда жаш, амбициялуу, бардык жаңылыктарды ишке ашырууга аракет кылышат” — деди.
Бишкектеги Орус үйүнүн жетекчиси Альберт Зулхарнеев алып баруучуга жана программанын бардык катышуучуларына активдүүлүгү үчүн ыраазычылык билдирди: «Рахмат! Сиздердин жеке кызыгууңуздарды эл сезди. Быйыл биз элдик дипломатиянын 100 жылдыгын белгилейбиз жана «Миссия Добро» программасы конкреттүү адамдар бири-бири менен кесипкөй жана достук байланыштарды түзгөн элдик дипломатиянын эң сонун үлгүсү болуп саналат”.
