Борбордук шайлоо комиссиясы өз талапкерлигин 6-округ боюнча көрсөткөн Шайлообек Атазовдун талапкерлигин каттоодон баш тартты. Мындай чечим БШКнын комиссиянын жыйынында кабыл алынды.
Жумушчу топ Атазов тапшырган документтер шайлоо мыйзамынын талаптарына жооп бербей турганын аныктады.
ИИМдин маалыматы боюнча, ал 2024-жылдан ушул күнгө чейин уюшкан кылмыштуу топтун мүчөсү. УКМКнын Чек ара кызматы Атазов 2024-жылы өлкө сыртында 260 күн жүргөнүн билдирди. Буга байланыштуу жумушчу топ аны каттоодон баш тартууну сунуштады.
ИИМдин өкүлү Шайлообек Атазовго уюшкан кылмыштуу топту каржылоо фактысы боюнча кылмыш иши козголгонун айтты.
Шайлообек Атазов ИИМдин маалыматы туура эмес экенин айтты.
«Менин уюшкан кылмыштуу топтун мүчөсү экендигим тууралуу эч жерде маалымат жок. Мен сотко берүүнү көздөп жатам. Акыркы жылдары мени бир нече жолу текшеришти жана мыйзамсыз эч нерсе табылган жок», — деди ал.
Атазовдун айтымында, ал спорттук ишмердүүлүгүнө байланыштуу чет өлкөдө жүргөн.
«Бирок анда мыйзамда мындай талап болгон эмес. Эгер билсем, мен чет өлкөдө 2 ай гана болуп, кайра кайтып келмекмин. Азыр мындай талапты колдонууга болбойт», — деди ал.
БШК төрагасы Тынчтык Шайназаров маалымдагандай, мыйзам Жогорку Кеңештин депутаттары тарабынан кабыл алынган.
«Адеп-ахлак бөлүгүн биз түшүнөбүз, сиз жаштарга жардам берип жатасыз жана буга байланыштуу чет өлкөдө болдуңуз. Бирок мыйзам менен эмне кылуу керек? Биз мыйзам чегинде иштешибиз керек», — деди ал.
БШК мүчөлөрү жумушчу топтун чечимин колдоп, Атазовду Жогорку Кеңештин депутаттыгына талапкер катары каттоодон баш тартышты.
