Бүгүн, 19-декабрда Токиого болгон иш сапарынын алкагында президент Садыр Жапаров Жапониянын императору Нарухито менен жолугушту. Тараптар эки тараптуу мамилелерди тереңдетүү жана маданий-гуманитардык кызматташтыкты өнүктүрүү маселелерин талкуулашты. Император Кыргызстандын башчысынын сапары өлкөлөр ортосундагы байланышты бекемдөөдө чоң мааниге ээ экенин белгиледи.
Сүйлөшүү учурунда Садыр Жапаров жапон билим берүү программаларынын маанилүүлүгүнө токтолду. Ал кыргыз эли Жапониянын салттарын сыйлай турганын, учурда республиканын жогорку окуу жайларында 700гө жакын студент жапон тилин үйрөнүп жатканын айтты. Президент өнөктөштүк мындан ары да кеңейерине ишеним артты.
Жолугушуунун негизги учуру расмий чакыруу болду. Садыр Жапаров император Нарухитону 2027-жылы Кыргызстанга келүүгө жана «Бишкек+25» Экинчи глобалдык тоо саммитине катышууга чакырды. Эске салсак, президент Жапонияга «Борбордук Азия + Жапония» диалогуна катышуу үчүн барган.
