Бишкек шаарынын Биринчи Май райондук соту 21-февралда «Вазелин» каймана аты менен белгилүү болгон УКМКнын мурдагы кызматкерин камакка алуу чечимин чыгарды. Бул маалыматты 27-февралда райондук соттун басма сөз кызматы тастыктады.
Маалым болгондой, У.У.К. аттуу жаран Кылмыш-жаза кодексинин 336-беренесинин 1-бөлүгү («Коррупция») боюнча шектелүүдө. Ал 15-апрелге чейин Бишкек ШИИБдин убактылуу кармоочу жайына киргизилди.
Буга чейин социалдык тармактардын кыргыз сегментинде спортчулардын, УКМК кызматкерлеринин, бизнесмендердин жана милиция кызматкерлеринин сүрөттөрү камтылган видео тараган. Роликтеги адамдарды авторлор УКМКнын Бишкек шаары боюнча башкармалыгынын мурдагы башчысы Элдар Жакыпбековдун «40 чоросуна» киргизишкен. Ал тизмеде «Вазелин» каймана аты бар кызматкер да аталган.
Маалыматтарга караганда, ал улуттук коопсуздук органдарына келгенге чейин милицияда иштеген.
Кийинчерээк УКМКнын басма сөз кызматы бул кырдаал боюнча комментарий берип, мамлекеттик органдарда «кол тийбестер» болбошу керектигин билдирген. Ведомство кызмат учурунда ыйгарым укуктарынан аша чапкандыгы үчүн айрым кызматкерлер иштен бошотулганын кабарлаган.
Ошону менен бирге, УКМК өз кызматкерлеринин расмий эмес каймана аттары тууралуу маалыматты четке какты. Мамлекеттик комитет мындай видеоматериалдар кызыкдар тараптар тарабынан таратылып жатканын жана алар комитеттин ишмердүүлүгү тууралуу коомчулукта терс пикир жаратууну көздөй турганын баса белгиледи.
