Баткен облусунда суу тартыштыгын жоюуга багытталган жасалма мөңгүлөр долбоору ийгиликтүү ишке ашырылууда. Бул тууралуу президенттин облустагы өкүлчүлүгүнөн билдиришти.
Маалыматка ылайык, облустук бийлик өкүлдөрү Россиянын Оштогу башкы консулу, БУУнун Азык-түлүк жана айыл чарба уюмунун жана ЕККУ өкүлдөрү менен биргеликте Лейлек районунун Көк-Таш айылындагы жасалма мөңгүнүн абалы менен таанышты.
Учурда Баткен жана Лейлек райондорунда жалпы 7 жасалма мөңгү курулуп, аларда жалпы 1,5 млн куб метрден ашык суу топтолду. Бул суу жаз жана жай айларында эгин сугарууга колдонулат.
Жасалма мөңгүлөр Газ, Согмент, Булак-Башы, Кайыңды (Баткен р-ну) жана Айбийке, Көк-Таш, Сумбула айылдарында жайгашкан. Бул ыкма климаттын өзгөрүү шартында дыйкандарды туруктуу суу менен камсыз кылууга шарт түзөт.
Тараптар бул тажрыйбаны облустун башка аймактарына да жайылтууну макулдашты.
