Непалдагы ири суу ташкыны жана жер көчкүлөрдүн кесепетинен каза болгондордун саны 469га жетти. Дагы 977 адам дайынсыз болууда, алардын 517си чет өлкөлүк жарандар. Кеминде 73 адам жабыркап, куткаруучулар 3 253 адамды эвакуациялашты.
Маалыматка караганда, кырсыкка 25-августта Лангтанг-Лирунг тоосунун түндүк капталындагы мөңгүнүн бир бөлүгүнүн кулашы себеп болгон. Муз массасы Лхенде-Кхола дарыясынын нугун бөгөп, андан кийинки суу ташкыны дагы үч дарыяга жайылган. Куткаруу иштерине 9,4 миңден ашуун аскер кызматкери жана милиция кызматкери, ошондой эле 15 тик учак тартылды.
