Кыргызстанда Жогорку Кеңештин депутаттары тиешелүү жогорку билими жок адамдардын төлгө ачуу, мистикалык жана психологиялык кызмат көрсөтүүсү үчүн айып пул киргизүүнү сунушташты. Мыйзам долбооруна ылайык, биринчи жолу мыйзам бузгандарга 10 миң сом, бир жыл ичинде кайталагандарга 20 миң сом айып салынат. Кардарларды ЖМК жана интернет аркылуу үзгүлтүксүз тарткандарга да 20 миң сом айып пул каралган.
Мындан тышкары, мындай кызматтарды социалдык тармактарда жана мессенджерлерде жарнамалоого чектөө киргизүү сунушталууда. Кардар тартууга багытталган пикирлер, сунуштамалар, маектер жана түз эфирлер да жарнама катары эсептелиши мүмкүн. Ал эми илимий, билим берүү жана журналисттик материалдарга тыюу салынбайт. Мыйзам долбоору коомдук талкууга чыгарылды.
