Уруксатпы бир төгүлүп ыйлоого

Уруксатпы бир төгүлүп ыйлоого,
Жаз экөөбүз жашык анан, тагдырлаш,
Уруксатпы карегиңде түнөөгө,
Батаар дейм бир үзүм жаз, тамчы жаш…

Уруксатпы сага айтпай сүйүүгө,
Сүйүлүүгө анткени кеч, кеч эми…
Уруксатпы кайтарууга карааның,
Карааныма зар болду эле нечени…

Уруксатпы кызганууга ичимден,
Бирок аны билбегениң дурустур…
Уруксатпы өрттөнүүгө унчукпай,
Ушу азыр алты айлам куруп тур…

Айжаркын Эргешова, акын, журналист