Султанбай Айжигитовдун ордуна 30 жаштагы Табылды Муратбеков Жогорку Кеңешке депутат болуп келди. Чечим бүгүн Борбордук шайлоо комиссиясынын отурумунда кабыл алынды.
«Ыйман нуру» партиясынан талапкер Муратбеков 1994-жылдын 10-ноябрында Ысык-Көл облусунун Түп районунда туулган. Жогорку билимдүү.
2020-2021-жылдары өкмөттүн Ысык-Көлдөгү ыйгарым укуктуу өкүлүнүн жардамчысы, андан кийин Региондорду өнүктүрүү боюнча мамлекеттик агенттиктин жетектөөчү адиси болуп иштеген.
Эске салсак, Султанбай Айжигитов 2018-жылы «Бейбаштык» беренеси боюнча күнөөлүү деп табылып, бирок мөөнөтү эскиргендиктен жазадан бошотулган. Ал бул фактыны депутаттыкка талапкер кезинде көрсөтпөй койгондуктан мандатынан ажыратылганы айтылган.
