Кыргызстандын 2025-жылкы биометрикалык жалпы жарандык паспорттору бүгүн, 3-ноябрдан тарта, колдонууга бериле баштады. Бул тууралуу «Кызмат» мамлекеттик ишканасы билдирди.
Маалыматка караганда документти алмаштыруу ыктыярдуу негизде жүргүзүлөт. Учурдагы паспорттор мөөнөтү бүткөнгө чейин жарактуу бойдон калат.
Жаңы паспортко өтүүнүн негизги себептери:
Кыргызстандын мамлекеттик желегинин өзгөртүлүшүнө байланыштуу;
документтерди даярдоонун толук циклин «Учкун» ААКнын кубаттуулугуна өткөрүү менен улуттук өндүрүштү күчөтүү;
аймакта эң жогорку коопсуздук деңгээлин камсыздаган жаңы технологияларды жана өзгөчө коргоо элементтерин киргизүү.
Жаңы паспорттун артыкчылыктары:
мамлекеттик чек арадан өткөн жарандарды эсепке алууну жакшыртуу;
чек аралар аралык кылмыштуулук жана мыйзамсыз миграция менен күрөштү күчөтүү;
документтерди жасалмалоодон коргоо;
өткөрмө бекеттеринде миграциялык көзөмөлдүн сапатын арттыруу.
