УКМК Чүй облусунун Ысык-Ата районуна караштуу Ичке-Суу айылынан курал-жарак жана ок-дарылар катылган жайды тапты. Алдын ала маалыматтар боюнча, бул куралдар 2022-жылы СИЗО-1де өлтүрүлгөн криминалдык авторитет Чыңгыз Жумагуловдун («Дөө Чыңгыз») кылмыштуу тобунун мүчөлөрүнө таандык.
Айылдагы жергиликтүү көрүстөндөрдүн биринин аймагында жайгашкан жашыруун жайдан төмөнкүлөр табылган:
-
Бир кесилген аңчылык мылтыгы (обрез);
-
2 даана револьвер тибиндеги тапанча;
-
2 даана «Черёмуха-1» кол газ гранатасы;
-
Бикфорд шнуру;
-
ПМ жана ТТ тапанчаларынын окчонтойлору (магазин);
-
Ар кандай калибрдеги ок-дарылар.
Маалыматка ылайык, бул куралдар мурда оор кылмыштарды жасоодо колдонулган жана келечектеги кылмыштуу пландар үчүн катылган. Учурда куралдардын келип чыгышы жана аларды каткандарды аныктоо иштери жүрүүдө.
