Президенттин басма сөз катчысы Аскат Алагөзов бул маалыматка байланыштуу түшүндүрмө берип, стадион 60 млн долларга курулуп бүттү деген маалымат туура эмес экенин билдирди.
Анын айтымында, бир дагы мамлекеттик орган же расмий тарап «Бишкек Арена» 60 млн долларга курулуп бүттү деп билдирген эмес.
«Мындай масштабдуу объектти 60 млн долларга арзан куруу мүмкүн эмес. Ошондуктан бул сандарды жөн гана пиар кылып жайылтууну токтотууну суранабыз.Дүйнөлүк практикага кайрылсак, дүйнө жүзүндө 50-60 миң орундуу заманбап стадиондордун курулушу 500 млн доллардан кем болбойт. Андан арзан баага салынган мындай объектилерди таба албайсыздар. Биздин стадион, албетте, мынчалык кымбатка турган жок, бирок такталбаган сандар менен коомчулукту адаштырууга жол бербейли», — деп жазды Алагөзов.
Ошол эле учурда ал стадиондун курулушуна кеткен каражат боюнча акыркы маалымат азырынча жок экенин белгиледи.
60 млн доллар деген цифра кайдан чыккан?
Бул сумма коомдук мейкиндикте мурда эле айтылып келген. «Бишкек Арена» курулуп жаткан мезгилде бир катар ЖМКлар анын болжолдуу баасын 60 млн доллар деп жазышкан. Мисалы, 2026-жылдын август айында AKIpress стадиондун курулушун эки жылдык долбоор катары көрсөтүп, бюджетин болжол менен 60 млн доллар деп берген.
Казакстандын Kursiv басылмасы да 31-августта «Бишкек Арена» тууралуу материалында долбоордун жалпы наркын болжол менен 60 млн доллар деп көрсөткөн.
Бирок бул цифранын кеңири тарашы анын расмий акыркы смета экенин автоматтык түрдө билдирбейт.
Sputnik Кыргызстан 31-августтагы материалында стадиондун жалпы наркы боюнча акыркы расмий сумма ачык жарыяланбаганын жазган. Басылманын маалыматына ылайык, 2024-жылдын апрелинде стадионду курууга 21 млн доллар бөлүнгөн, бирок бул объекттин акыркы наркы эмес, ошол учурда бөлүнгөн каражат болгон.
Демек, азыркы талаштын негизги суроосу — «60 млн доллар деген цифра барбы же жокпу?» эмес, бул сумма «Бишкек Аренанын» акыркы, документ менен бекитилген курулуш наркыбы же жокпу дегенде турат.
«Коңшу өлкөлөрдөн арзан» деген салыштыруулар да талкууда
Стадиондун баасы тууралуу талкуу күчөгөндө социалдык тармактарда аны Казакстандагы айрым спорттук объектилер менен салыштырган пикирлер да тарады.
Бирок мындай салыштырууларда объектилердин көлөмү, сыйымдуулугу, инженердик инфраструктурасы, курулуштун өзгөчөлүктөрү жана функционалдык мүмкүнчүлүктөрү эске алынышы керек.
«Бишкек Арена» 51 миң көрүүчүгө ылайыкталган ири спорттук комплекс болуп саналат. Стадиондун сыйымдуулугу баштапкы долбоордогу 45 миң орундан кийин 51 миңге чейин көбөйтүлгөнү тууралуу маалымат буга чейин да жарыяланган.
Ошондуктан бир гана орундардын саны менен башка өлкөдөгү стадиондун курулуш баасын түз салыштырып, «арзан» же «кымбат» деген жыйынтык чыгаруу туура эмес.
Акыркы бааны комиссия чыгарат
Алагөзовдун маалыматына ылайык, учурда «Бишкек Аренага» кеткен чыгымдарды тактоо үчүн атайын комиссия түзүлгөн.
Анын курамына Эсеп палатасы, Ички иштер министрлиги, прокуратура жана башка тиешелүү мамлекеттик органдар кирген.
Комиссия курулушка кеткен чыгымдарды жана тиешелүү документтерди деталдуу карап чыгат. Иш болжол менен 1–2 айга созулары айтылды.
Анын жыйынтыгында стадиондун курулушуна кеткен так жана акыркы сумма коомчулукка ачык жарыяланат.
Алагөзов жарандарды жана блогерлерди такталбаган маалыматтарды таратуудан оолак болууга чакырды. Айрыкча «коңшу өлкөлөрдөн арзан болду» деген салыштырууларды азырынча такталган факт катары көрсөтпөөгө үндөдү.
Ошентип, «Бишкек Арена» канча каражатка курулган деген суроого азырынча акыркы чекит коюла элек. Так сумманы комиссиянын корутундусу аныктайт.
