Ырчы Анжелика Дубайдагы көргөзмөдөгү кыргыз павильонун көрүп көзүнө жаш алды

Ырчы Анжелика Кайратова Дубай ЭКСПОдогу Кыргызстандын павильонун көрүп көзүнө жаш алды. Бул тууралуу ырчы айым инстаграм баракчасына жазды.

Ал ата мекендик ишкерлерди павильонду оңдоого каражат бөлүүгө чакырды.

«Ар бир мамлекет өзүнүн маданиятын, тарыхын, туристтик жерлерин жана кызыктуу жерлерин көрсөттү. Эң өкүнүчтүүсү, мындан эки жыл мурун Кыргызстанга көргөзмөдөн орун берилгенде президент, министрлер көңүл бурбай, каражат бөлбөй койгон. Бул жерде эч кимди күнөөлөөнүн кереги жок. Мунун баары өлкөбүздөгү туруксуздуктан болуп жатат. Буга жооптуу болгон мурдагы министрлер орундарын таштап кетишти. Чет өлкөдөгү мамлекетибиз эң жакыр өлкөлөрдүн катарына кошулду. Буга байланыштуу арабдар павильонубузду оңдоп, бизге жардам беришти. Кыргызстан ушул күнгө чейин буга көңүл бура элек”,-деди ырчы көзүнө жаш алып.

Анда аткаруучу бийликке келген патриоттор, мекенин коргоп, жардам берип жатканы тууралуу жазган.

«Мен муну коомчулукка айтып жатам, анткени кеңселерди кыдыруунун мааниси жок. Ар бир адам жардам берүүгө даяр болушу керек. Өзүн “мыктымын” дегендер жаңылып, элди сатып алам деп, шайлоого акча коротуп жатышат. Тарыхта кала турган чоң жакшылык кылсаң эл сени сүйөт.

Макул, биз кедей мамлекетпиз. Акчасы аз, араң жетет. Бирок бизде колунда бар адамдар да бар. Мен алардын баарын бириктиргим келет. Кыргызстаныбызга жардам берели! Жүздөгөн бизнесмендер жана ишкер аялдар бар! Биздин павильонго ар ким 1000 доллар бөлүп берсе, анда алардын ысымдары тарыхта калат. Эл аларга ыраазы болот. Бизге биримдик керек!”, – деп жазат Анжелика.

Эске салсак, Дубай ЭКСПО 2020-жылдын 20-октябрынан 2021-жылдын 10-апрелине чейин өтүшү керек болчу. Бирок, коронавирус пандемиясы күчөгөндүктөн, ал кийинки жылга жылдырылган. БАЭ “Туруктуулук, мобилдүүлүк жана мүмкүнчүлүктөр” менен “Акылдарды бириктирүү, келечекти түзүү” темасын тандаган.