Тоң районунда 200 орундуу тигүү фабрикасы ачылды
Тоң районунун Кажы-Сай айылына 200 орундуу “Актис” тигүү фабрикасынын филиалы ачылды. Бул тууралуу Ысык-Көл өнүктүрүү фондунун басма сөз кызматы билдирет.
Маалыматка ылайык, ишкананын ачылышына Ысык-Көл облусун өнүктүрүү фондусу 10 миллион сом пайызсыз насыя бөлгөн.
«Учурда ишканада 90 жумушчу иштеп жатат. Алардын орточо айлык акылары 25-35 миң сомго чейин барат. Буйрутмалардын басымдуу бөлүгү Россиядан келет. Ишкана жетекчиси белгилегендей, акыркы күндөрү Россиядан буйрутмалар көбөйдү. Андыктан тикмечилердин бир айлык эмгек акысы 45 миң сомго чейин жетиши мүмкүн. Фабрикада кызматкерлер үчүн бардык шарттар түзүлгөн», — деп айтылат маалыматта.
Белгиленгендей, Ысык-Көл облусун өнүктүрүү фондусунун колдоосу менен ачылып жаткан тигүү фабрикаларынын бирден бир максаты жергиликтүү тургундарды жумуш орду менен камсыз кылуу жана ишкерлерди колдоо болуп саналат.
