ЕЭК коллегиясынын төрагасы Михаил Мясникович Бишкекке келди
Евразиялык экономикалык комиссиянын коллегиясынын төрагасы Михаил Мясникович башында турган делегация Бишкек шаарына келди.
Михаил Мясникович Бишкекте 26-майда өтө турган биринчи Евразиялык экономикалык форумуна, 27-майда Жогорку Евразия экономикалык кеңешинин жыйындарына катышып, Кыргызстандын жетекчилиги менен жолугушууларды өткөрөт.
Белгилей кетсек, 26-майда өтө турган экономикалык форумга 15 өлкөдөн 2,5 миңден ашык адам катышат. Форум коронавирус пандемиясына байланыштуу тыныгуудан кийин ЕАЭБдеги ири бизнес иш-чараларынын бири болмокчу. Анын алкагында 35 иш-чара өтөт. Форум Евразиялык экономикалык биримдигинин өлкө башчыларынын катышуусундагы пленардык жыйынды, андан тышкары, 21 тематикалык сессияны камтыйт.
Ал эми 27-майда ЕАЭБге мүчө мамлекеттердин лидерлеринин катышуусунда видеоконференция форматында Жогорку Евразиялык экономикалык кеңештин (ЖЕЭК) кезектеги жыйыны өтөт.
Иш-чараны видеоконференция форматында өткөрүү чечими учурдагы эл аралык кырдаалды эске алуу менен кабыл алынды.
Саммиттин күн тартибинде 14 маселени талкуулоо пландаштырылган, анын ичинде ЕАЭБге мүчө мамлекеттердин 2022-2023-жылдарга макроэкономикалык саясатынын негизги багыттары, 2021-жылга ЕАЭБдин ички рыногундагы тоскоолдуктарды четтетүү боюнча иштердин жыйынтыктары, ЕАЭБ эл аралык ишмердүүлүгүнүн негизги багыттары ж.б.
Жыйынга Беларустун президенти Александр Лукашенко, Казакстандын президенти Касым-Жомарт Токаев, Россиянын президенти Владимир Путин, Армениянын премьер-министри Никол Пашинян катышат. Байкоочу өлкөлөрдүн лидерлери катары Өзбекстандын президенти Шавкат Мирзиёев жана Кубанын президенти Мигель Диас-Канель катышат.
Эске салсак, 2022-жыл ичинде Кыргызстан Жогорку Евразиялык экономикалык кеңешке, Евразиялык өкмөттөр аралык кеңешке жана Евразия экономикалык комиссиясынын кеңешине төрагалык кылат.
