Франциялык компания Ысык-Көлгө 61 млн долларга канализация куруп беришет

Франциялык компания Ысык-Көлдө канализация курат. Бул тууралуу Жогорку Кеңештин Агрардык саясат, суу ресурстары, экология жана аймактык өнүктүрүү боюнча комитетинин жыйынында Мамкурулуштун директорунун биринчи орун басары Жолдошбек Абдыраев билдирди.

Маалыматка караганда, Ысык-Көл облусундагы тазалоочу жайларды куруу боюнча долбоор даярдалууда.

«АӨБдүн жардамы менен франциялык компания тандалып алынган. Долбоор 61 млн долларга бааланган», — деди Абдыраев.

Бостери жана Кара-Ой айылдарынын ортосуна канализация курулат. Мындан тышкары, бул каражатка туристтер үчүн инфраструктура оңдолуп, тарыхый музей ремонттолот. Француз компаниясы менен түзүлгөн келишим жазында парламенттин ратификациясына коюлат. Бирок анда компаниянын аты аталган жок.