Бишкекте жолдорду кардан тазалоо иштерине 20 тонна туз керектелди

Бишкек шаарында жолдорду кардан тазалоого эртең мененки убакытка карата 20 тонна туз керектелди. Бул тууралуу шаардык мэриядан билдиришти.

Маалыматка ылайык, жол тазалоо иштерине 38 атайын техника, 26 кар тазалоочу унаа, 4 универсалдуу унаа, 4 «Беларусь» кичи трактору, 2 фронттук жүктөгүч жана ЗИЛ базасындагы 2 кум чачуучу техника тартылган.

«Жол тазалоо иштери таңкы саат 4:00дө башталган. Мындан тышкары 650 көчө шыпыргыч штаттык негизде иштеп жатат. Учурда «Тазалык» кызматкерлери жолдорду кардан тазалоо боюнча тийиштүү иштерди жүргүзүүдө», — деп билдиришти мэриядан.

Бишкектеги тазаланбай калган участокторго күбө болгон жарандар төмөнкү: 0554 182 185 же 1840 жана 1850 номерлерине (күнү-түнү) чалып билдирсе болот.

Белгилей өтсөк, учурда борбор калаада 129 троллейбус, 83 автобус, 770 кичи автобус жүргүнчүлөрдү ташууда.