УКМКнын мурдагы төрагасы Камчыбек Ташиевдин жактоочусу Икрамидин Айткулов «75чилердин каты» боюнча Биринчи май райондук сотунун өкүмүнө каршы Бишкек шаардык сотуна апелляциялык арыз берди. Бул тууралуу адвокат Sputnik агенттигине ырастады.
Ал эми бул иш боюнча айыпталуучулардын бири Эмилбек Узакбаевдин жактоочусу Акынбек Ногоев жогорку инстанцияга даттанбаганын, азырынча андай ою жок экенин айтты.
Калган алты адам кийинки инстанцияга арыз берген-бербегени азырынча белгисиз.
Эске салсак, аталган иш боюнча айыпталгандарга 2-июлда Биринчи май райондук сотунун өкүмү чыккан. УКМКнын мурдагы төрагасы Камчыбек Ташиев, Жогорку Кеңештин экс-спикери Нурланбек Тургунбек уулу жана Жогорку Кеңештин мурдагы депутаты Курманкул Зулушев «Бийликти күч менен басып алуу» беренеси менен күнөөлүү деп табылып, ар бири төрт жылга эркинен ажыратылган.
Ушул эле берене менен коомдук саясий ишмер Бекболот Талгарбеков, Кыргызстандын Өзбекстандагы мурдагы элчиси Эмилбек Узакбаев, Жогорку Кеңештин экс-депутаты Курманбек Дыйканбаев, экс-депутат Аалы Карашев жана ички иштер министринин мурдагы орун басары Курсан Асанов да күнөөлүү деп табылып, ар бири төрт жылга соттолгон.
Судья баарына үч жылдык пробация берген, тагыраагы, айыпталуучулар эркиндикте калган. Ошондой эле баарынын тең мүлкү мамлекетке алынмай болгон.
