4-августтан баштап үч жашка чейинки балдар үчүн «Бала ырысы» жаңы айлык жөлөкпулунун алгачкы төлөмдөрү башталат. Бул тууралуу Эмгек министрлигинен билдиришти.
Маалымат боюнча, мамлекеттик жардамдын өлчөмү бир балага айына 1 миң 200 сомду түзөт. Акча июль айында арыз толтурган ата-энелерге берилет. Акчаны «Элдик Банк» жана «АБанк» аркылуу алууга болот.
Документтерди кабыл алуу 1-июлда башталды. Жарандардын басымдуу бөлүгү «Түндүк» мобилдик тиркемеси аркылуу арыздарды санарип форматында жөнөтүштү.
Социалдык эмгек министрлигинин маалыматы боюнча, төлөмдөрдүн жаңы программасынын критерийлерине үч жашка чейинки 440-470 миң бала кирет.
