Орусиянын Тышкы иштер министрлиги Казакстандагы кырдаалды мамлекеттин коопсуздугуна жана бүтүндүгүнө зордук-зомбулук менен зыян келтирүү аракети катары баалайт.
Бул «машыктырылган жана уюшкан куралдуу түзүлүштөрдү» колдонуу менен болуп жатат, деп кошумчалады департамент.
«Орусия Федерациясы ЖККУнун алкагындагы союздаштык милдеттенмелерин сактоону ырастап, Казакстандагы ички саясий кырдаалдын тез начарлашына жана зордук-зомбулуктун күчөшүнө байланыштуу чукул чараларды көрүүнү колдоду», — деп айтылат министрликтин сайтында.
Тышкы иштер министрлиги алар республикада «кадимки жашоо тезирээк калыбына келишине» кызыкдар экенин баса белгиледи.
Жамааттык коопсуздук келишими уюмунун катчылыгынан мурда маалымдалгандай, кырдаалды турукташтыруу үчүн ЖККУнун Жамааттык тынчтык орнотуучу күчтөрү Казакстанга чектелген мөөнөткө жөнөтүлгөн. Алар башка нерселер менен катар мамлекеттик жана аскердик объектилерди кайтарып, укук тартибин сактоочу күчтөргө жардам беришет. ЖККУнун контингентинин алдыңкы бөлүктөрү өз милдеттерин аткарууга киришти.
Казакстанда нааразылык акциялары жаңы жылдын алгачкы күндөрүндө башталган. Мунай өндүрүүчү Мангистау облусунда жайгашкан Жаңы-Өзөн жана Актау шаарларынын тургундары унааларга күйүүчү май катары колдонулган суюлтулган газдын баасы эки эсеге көтөрүлгөнүнө каршы митингге чыгышты. Республикалык Энергетика министрлиги 1-январдан тарта анын баасы суроо-талап менен сунуштун негизинде электрондук биржа соодасында калыптана баштаганын түшүндүрдү.
4-январда бийлик митингчилердин негизги талабын — газдын баасын арзандатууну аткарууга даяр экенин билдирген. Ага карабастан башка шаарларда нааразылык акциялары башталды.
Кечээ эртең менен Токаев өкмөттү отставкага кетирип, алты айга күйүүчү майдын баасын мамлекеттик жөнгө салууга буйрук берди. Ал ошондой эле буга чейин республиканын биринчи президенти Нурсултан Назарбаев жетектеген Коопсуздук кеңешинин башчысы болоорун жарыялап, кырдаалды жөнгө салуу боюнча жаңы чараларды жарыялады.
Президент митингчилерге тартип бузгандарга бийлик эң катаал чараларды көрөрүн эскертти, анткени тополоңдун кесепетинен күч түзүмдөрү буга чейин курман болуп, жапа чеккен. Мындан тышкары демонстранттар административдик имараттарга жана милиция бөлүмдөрүнө чабуул жасоого бир нече жолу аракет кылышкан, анын жүрүшүндө ондогон адамдар набыт болгон.
Республика боюнча өзгөчө кырдаал режими киргизилген.