Зеленский: Украинада 4,5 миллион адам электр жарыгысыз калды

Украинанын президенти Владимир Зеленский 3-ноябрда электр жарыгын өчүрүүлөрдөн 4,5 миллиондой киши жабыркаганын билдирди.

 Анын айтымында, жарыкка байланыштуу көйгөйлөр Киевде, ошондой эле Днепропетровск, Житомир, Запорожье, Киевскийде, Кировоград, Сумы, Харьков, Хмельницкий, Черкассы жана Чернигов облустарында байкалууда.

«Бүгүн кечинде гана 4,5 миллионго жакын керектөөчү өзгөчө кырдаалдар жана турукташтыруу графигине ылайык керектөөдөн убактылуу өчүрүлдү», — деди Зеленский Telegram баракчасында күнүмдүк видео кайрылуусунда. Ал жергиликтүү бийликти электр жарыгын негизсиз колдонбоого, ошондой эле электр жарыгынын өчүрүлүшүнүн себептерин жарандарга түшүндүрүүгө чакырды.

Укренерго билдиргендей, жума күнү, 4-ноябрда саат 00:00дөн 24:00гө чейин Днепропетровск, Кировоград облустарында жана Запорожьенин украиндер көзөмөлдөгөн бөлүгүндө, ошондой эле Сумы, Харьков жана Полтавада электр энергиясын колдонуу чектелет. «Саат 07:00дөн 22:00гө чейин Киев, Киев, Чернигов, Черкассы жана Житомир облустарында сааттык өчүрүү графиги иштейт», — деп билдирди компания.

10-октябрдан бери Орусия Украинанын аймагына массалык сокку уруусун күчөттү. 31-октябрда Украинанын премьер-министри Денис Шмихал аткылоодон улам 18 инфраструктура объектиси жабыркаганын, алардын көбү энергетикалык объектилер болгонун билдирди. Ошол эле күнү украиналык энергетикалык ДТЕК компаниясы оңдоо иштерине жабдыктардын жоктугун айтып даттанган.